कबधौं मिलै मोहि श्रीगुरु मुनिवर, करि हैं भवोदधि पारा हो।।
भोगउदास जोग जिन लीनों, छाँडि परिग्रहभारा हो ।
इन्द्रिय दमन वमन मद कीनो, विषय कषाय निवारा हो ।१।
कंचन काँच बराबर जिनके, निंदक बंदक सारा हो ।
दुर्धर तप तपि सम्यक निज घर, मनवचतनकर धारा हो ।२।
ग्रीषम गिरि हिम सरिता तीरै, पावस तरुतल ठारा हो ।
करुणाभीन चीन त्रसथावर, ईर्यापंथ समारा हो ।३।
मार मार व्रत धार शील दृढ़, मोह महामल टारा हो ।
मास छमास उपास वास वन, प्रासुक करत अहारा हो ।४।
आरत रौद्रलेश नहिं जिनके, धर्म शुकल चित धारा हो ।
ध्यानारूढ़ गूढ़ निज आतम, शुधउपयोग विचारा हो ।५।
आप तरहिं औरनको तारहिं, भवजलसिंधु अपारा हो ।
दौलत ऐसे जैन-जतिनको, नितप्रति धोक हमारा हो ।६।